Presidenti rus Vladimir Putin nuk ka gjasa t'i nënshtrohet ultimatumit që skadon këtë të premte, të lëshuar nga Presidenti i SHBA-së Donald Trump dhe vazhdon të mbështesë qëllimin për të marrë nën kontroll plotësisht katër rajone të Ukrainës, thanë burime pranë Kremlinit për Reuters. Trump ka kërcënuar të godasë Rusinë me sanksione të reja dhe të vendosë tarifa 100% për vendet që blejnë naftën e saj, mes të cilave Kina dhe India, nëse Putin nuk pranon një armëpushim në luftën në Ukrainë. Vendosmëria e Putinit për të vazhduar nxitet nga besimi i tij se Rusia po fiton dhe nga skepticizmi se akoma më shumë sanksione të SHBA-së do të kenë ndonjë ndikim të madh, pas valëve të njëpasnjëshme të ndëshkimeve ekonomike gjatë 3 viteve e gjysmë të luftës, sipas tre burimeve të njohura me diskutimet në Kremlin. Udhëheqësi rus nuk dëshiron ta zemërojë Trumpin dhe e kupton se mund të jetë duke refuzuar një shans për të përmirësuar marrëdhëniet me Uashingtonin dhe Perëndimin, por qëllimet e tij të luftës kanë përparësi, thanë dy nga burimet. Qëllimi i Putinit është të pushtojë plotësisht rajonet ukrainase të Donetskut, Luhanskut, Zaporizhias dhe Khersonit, të cilat Rusia pretendon si të vetat, dhe më pas të bisedojë për një marrëveshje paqeje, tha një nga burimet. "Nëse Putini do të ishte në gjendje t'i pushtonte plotësisht ato katër rajone, ai mund të pretendonte se lufta e tij në Ukrainë i ka arritur objektivat e tij", thotë James Rodgers, autor i një libri që pritet të publikohet me titull "Kthimi i Rusisë". Në një shenjë se mund të ketë ende një mundësi për të arritur një marrëveshje para afatit, i dërguari special i Trump, Steve Ëitkoff, pritet të vizitojë Rusinë këtë javë, pas një përshkallëzimi të retorikës midis Trump dhe Moskës mbi rreziqet e luftës bërthamore.