Një gjykatës në Brazil ka vendosur masën e arrestit shtëpiak ndaj ish-presidentit të vendit, Jair Bolsonaro, pasi doli në përfundimin se ai ka shkelur një ndalesë për përdorimin e rrjeteve sociale. Ky vendim ka thelluar edhe më shumë përplasjet mes gjykatës dhe politikanit, i cili akuzohet për komplot për grusht shteti. Bolsonaro po përballet me gjykim në Gjykatën Supreme lidhur me dyshimet se kishte planifikuar që të qëndronte në pushtet edhe pasi humbi zgjedhjet e vitit 2022 ndaj presidentit aktual, Luiz Inacio Lula da Silva. Presidenti amerikan, Donald Trump, ka ndëshkuar Brazilin, pasi e ka vlerësuar gjyqin ndaj Bolsonaros si proces të motivuar politikisht, duke vendosur tarifa të larta ndaj ekonomisë më të madhe në Amerikën Latine. Bolsonaros, 70 vjeç, i është ndaluar përdorimi i rrjeteve sociale gjatë kohëzgjatjes së procesit gjyqësor dhe palëve të treta e po ashtu i është ndaluar të shpërndajë deklaratat e tij publike. Por, të dielën aleatët e tij sfiduan urdhrin duke shpërndarë në internet pamje të një bisede mes Bolsonaros dhe djalit të tij të madh, Flavio, gjatë një tubimi. Gjykatësi i Gjykatës Supreme, Alexandre de Moraes, reagoi ashpër, duke deklaruar se drejtësia nuk do të lejojë që një i akuzuar “ta trajtojë gjyqësorin si budalla”, për shkak të “fuqisë së tij politike dhe ekonomike.” Duke kritikuar Bolsonaron se “vazhdimisht” nuk ka respektuar kufizimet që gjykata ka vendosur ndaj tij, gjykatësi urdhëroi që ai të dërgohet në arrest shtëpiak dhe këtë dënim ta vuajë në shtëpinë e tij në kryeqytet, Brazilia.