Pjesë të Hong Kongut u zhytën nën ujë pas përmbytjeve të shkaktuara nga shirat e rrëmbyeshëm të martën, pasi paralajmërimi më i lartë për stuhi u lëshua për herë të katërt në tetë ditë. Qyteti regjistroi reshjet më të mëdha ditore në gusht që nga fillimi i regjistrimit të të dhënave në vitin 1884, pak mbi 355 milimetra të regjistruara në selinë e observatorit të motit të Hong Kongut në orën 14:00 të së martës. Qendra financiare ka pezulluar mësimin në shkolla dhe ka hapur qendra të përkohshme strehimi, ndërkohë që disa shërbime spitalore si klinikat ambulatore janë prekur gjithashtu. Observatori tha se paralajmërimi "i zi" për stuhi, që do të thotë reshje që tejkalojnë 70 milimetra në një orë, do të mbetet në fuqi të paktën deri në mbrëmje. Më shumë se 9,600 goditje rrufeje nga retë në tokë u regjistruan midis orës 05:00 të mëngjesit dhe mesditës. Shërbimi meteorologjik paralajmëroi të martën pasdite se "stuhia e vazhdueshme e shiut do të shkaktojë përmbytje serioze në rrugë dhe bllokim të trafikut". Një gazetar i AFP pa disa anije të vogla të përmbyseshin ndërsa makinat u filmuan pothuajse të zhytura nën ujë, në një parking. Autoritetet i kërkuan publikut të qëndronte vigjilent dhe thanë se punëdhënësit duhet të merrnin masa për të siguruar kushte fleksibël pune për sigurinë e punonjësve. Transporti publik u bllokua dhe aeroporti regjistroi vonesa dhe anulime të fluturimeve.