Presidenti amerikan Donald Trump, tha se do vendoste 800 trupa të Gardës Kombëtare në Uashington dhe do merrte përkohësisht kontrollin e departamentit të policisë së qytetit, një imponim i jashtëzakonshëm ky i pushtetit presidencial në kryeqytetin e vendit. Lëvizja e Trump, e cila anashkaloi udhëheqësit e zgjedhur të qytetit, është në fakt në linjë me qasjen e tij gjatë këtij mandati të dytë, e cila e ka parë atë të ushtrojë autoritet ekzekutiv në mënyra të paprecedenta në historinë moderne të SHBA-së dhe në kundërshtim me normat politike. Presidenti i cilësoi veprimet e tij si të nevojshme për të "shpëtuar" Uashingtonin nga një valë e supozuar paligjshmërie. Statistikat tregojnë se krimi i dhunshëm u rrit në vitin 2023, por ka qenë në rënie të shpejtë që atëherë. "Kryeqyteti ynë është pushtuar nga bandat e dhunshme dhe kriminelët e etur për gjak", tha Trump në një konferencë për shtyp në Shtëpinë e Bardhë. Kjo është hera e dytë këtë verë që presidenti republikan vendos trupa në një qytet të qeverisur nga Demokratët. Një gjyq federal nisi të hënën në San Francisko për të zbuluar nëse Trump shkeli ligjin amerikan duke vendosur trupa të Gardës Kombëtare në Los Angeles në qershor pa miratimin e Guvernatorit të Kalifornisë, Gavin Neësom. Dhe Trump sinjalizoi se qytete të tjera të mëdha amerikane me udhëheqje demokrate mund të jenë të radhës, përfshirë Çikagon, një qytet që prej kohësh është prekur nga krimi i dhunshëm, megjithëse vala ra ndjeshëm në gjysmën e parë të vitit.