Tërheqja e trupave ruse vazhdon të tregojë një tmerr të paimagjinueshëm në Ukrainë. Në zonën e Bucha-s, qytet në veri perëndim të Kievit, që sapo është cliruar nga pushtimi i Moskës, rrugët janë mbushur me trupa civilësh. Qeveria e kievit flet për ekzekutime masive. “Trupa njerëzish me duar të lidhura, të vrarë me armë zjarri nga ushtarët rusë, shihen nëpër rrugë. Këta njerëz nuk ishin ushtarë. Nuk kishin armë. Nuk përbënin asnjë kërcënim. Edhe sa raste të tjera të ngjashme po ndodhin në këto momente në territoret e pushtuara?”, shkruan në tëitter këshilltari i presidentit ukrainas, Mykhaylo Podolyak. Ai ka postuar një foto që tregonin tre trupa të pajetë në rrugë, një prej të cilëve me duart e lidhura pas shpine. E kjo është konfirmuar edhe nga disa gazetarë atje. Ministria ukrainase e mbrojtjes, në faqen e saj në tëitter, ka publikuar ndërkohë një video të regjistruar nga trupat ukrainase që patrullonin në një nga rrugët e qytetit të mbushur me kufoma. “Këtu ka rreth 300 persona të hedhur në varre të përbashkëta”, ka thënë kryebashkiaku, Anatoly Fedoruk. Ndërkohë nga dëshmitë në terren, sic shkruan Guardian, ushtarët rusë kanë përdorur fëmijët ukrainas si mburoja njerëzore në mjetet e tyre për të mbrojtur lëvizjet e. E kjo nuk ka ndodhur vetëm në Bucha. Dëshmitarët kanë rrëfyer për karroca foshnjesh të vendosura para tankeve në fshatin Novyi Bykiv, afër Chernihivit. Është thënë po ashtu se fëmijët janë marrë edhe peng në një seri pikash të nxehta të konfliktit në të gjithë vendin për të garantuar që banorët lokalë të mos u jepnin koordinatat e lëvizjeve të armikut forcave ukrainase. Ukraina thotë se ka rimarrë tani kontrollin e të gjithë rajonit të Kievit, me trupat ruse që po tërhiqen.