Bashkia e Tiranës ka gjetur një mënyrë ndryshe për tu sensibilizuar me Ukrainën, në ditët e saj më të vështira, ku Rusia vijon bombardimet në ditën e 10. Kryebashkiaku Erion Veliaj ka bërë të ditur se institucioni që ai drejton do të emërtojë të hënën, njërën nga rrugët e bllokut të ambasadave me emrin “Ukraina e Lirë”. Nëpërmjet një postimi në facebook, Veliaj shprehet se “ Për rastësi, në atë rrugë ndodhen edhe selitë e ambasadave të Ukrainës, Rusisë, Serbisë dhe Kosovës”. Sipas kryebashkiakut, “Lufta e Serbisë ndaj Kosovës dhe lufta e Rusisë ndaj Ukrainës kanë shenjuar gjeneratën tonë”, e për këtë ai shprehet se kjo rrugë do të shenjojë qytetin tonë. I pari i kryeqytetit shprehet se pas këtij vendimi, ambasadave do t’u duhet të ndryshojnë adresën në kartëvizitat e tyre. Po ashtu ai dha lajmin se këtë të dielë është nisur kamioni i parë me ndihma nga qytetarët e Tiranës, i cili do të mbërrijë këtë fundjavë në kufirin midis Polonisë dhe Ukrainës.