Ambasadorja amerikane në Tiranë, Yuri Kim i ka bërë thirrje Kuvendit të zgjasë mandatin e Vettingut. Pas një takimi që zhvilloi me ambasadorin e OSBE-së, Del Monaco, diplomatja amerikane përmes një postimi në Tëitter theksonte se duhen përmbushur rekomandimet e OSBE/ODIHR për reformën zgjedhore. “U takova me Ambasadorin e OSBE në Shqipëri Del Monaco sot për të diskutuar një sërë çështjesh. Ramë dakord që, në përputhje me rekomandimin e ONM-së, Parlamenti duhet të miratojë reformën kushtetuese për të zgjatur mandatin e vetingut. Gjithashtu jemi dakord që autoritetet dhe palët duhet të veprojnë sipas rekomandimeve të OSBE/ODIHR mbi zgjedhjet”, shkruan ambasadorja Kim. Grupi parlamentar i Partisë Socialiste ka dorëzuar në Kuvend kërkesën për shtyrjen e afatit të organeve të Vettingut. Socialistët kërkojnë që zgjatja e mandatit të jetë deri në 31 dhjetor të 2024, pra me 2 vite e gjysmë. Ndërkohë, organeve të Vetingut i përfundon mandati në qershor të vitit 2022. Në një deklaratë të tij pak ditë më parë kryeministri Edi Rama tha se zgjatja e afateve të Reformës në Drejtësi nuk është diçka për t’u negociuar me opozitën, por detyrim që lidhet me të ardhmen e vendit. Sipas kreut të qeverisë, zgjatja e mandatit të Vettingut është një domosdoshmëri që vjen si rezultat i një procesi që ka treguar sesa i vyer është për largimin e llumit nga sistemi i drejtësisë.