Vendet afrikane po bëjnë thirrje që harta e botës të rivizatohet për të treguar "madhështinë e kontinentit". Bashkimi Afrikan ka thënë se shumica e hartave nuk tregojnë madhësinë e masës tokësore, duke e bërë Afrikën të duket shumë më e vogël krahasuar me vendet dhe kontinentet e tjera. Blloku prej 55 vendesh ka mbështetur aktivistët që argumentojnë se shtrembërimi çon në minimizimin e shkallës dhe rëndësisë së kontinentit, si dhe i bën Amerikën dhe Evropën të duken më të mëdha nga sa janë. Harta aktuale që është në përdorim që nga shekulli i 16-të e bën Afrikën të duket relativisht e vogël pasi i fryn masat tokësore më tej nga ekuatori. Kjo do të thotë që Groenlanda duket pothuajse me të njëjtën madhësi si Afrika, kur, në realitet, është më e vogël se Gadishulli Arabik. Afrika është 14 herë më e madhe. Bashkimi Afrikan po mbështet tani fushatën ‘Correct the Map’ për të promovuar projeksionin e vitit 2018 "Equal Earth" si një alternativë, sepse ajo "tregon kontinentin ashtu siç është në të vërtetë: i gjerë, i fuqishëm dhe qendror për botën". Aktivistët duan që kjo hartë të përdoret nga organet ndërkombëtare si Kombet e Bashkuara, si dhe në klasa dhe në media. "Në një botë ku madhësia shpesh barazohet me fuqinë, keqinterpretimi i shkallës së vërtetë të Afrikës përforcon keqkuptimet e dëmshme në lidhje me rëndësinë e saj gjeopolitike dhe ekonomike. Mund të fusni brenda afrikës Shtetet e Bashkuara, Kinën, Indinë, Japoninë, Meksikën dhe pjesën më të madhe të Evropës, dhe prapë të keni tokë të lirë. Megjithatë, pjesa më e madhe e botës vazhdon të favorizojë këtë hartë të shtrembëruar, duke keqinterpretuar shkallën e Afrikës dhe duke zvogëluar rëndësinë e saj", thotë fushata.