Pas rritjes së shpejtë të tensioneve në Veri të Kosovë, Ish-kryeministri Isa Mustafa ka kërkuar të shtunën mbledhjen e Këshillit të Sigurisë. Përmes një postimi në Facebook, Mustafa ka thënë se situata në pikat kufitare me Serbinë është tepër serioze dhe e rrezikshme. Sipas tij, krerët e shtetit duhet të jenë të tre në Kosovë. “Në një situatë të tillë, Presidentja, Kryeministri dhe Kryeparlamentari duhet të jenë në Kosovë. Nuk mund të dërgojnë mesazhe, njëra nga Neë Yorku, tjetri nga Shkupi e nga Budapesti, ndërkohë që Njësitë Speciale të Policisë të Kosovës të mbesin të mbërthyera në Jarinje e Bërnjak nën kërcënimin e helikopterëve, avionëve e tankeve të Serbisë. Kjo sjellje është joserioze dhe e pafalshme”, ka shkruar ai. Mustafa thotë se presidentja duhet të thërrasë Këshillin e Sigurisë dhe të ndërmerren masat e nevojshme. Po aq e rëndësishme sipas tij, është që Kosova të koordinohet me partnerët si SHBA, BE dhe KFOR.