Një superjaht 41 metra i gjatë u përfshi nga flakët në St Tropez të enjten dhe shërbimet e emergjencave druanin se ai do të fundosej në portin francez, të mbushur me pasanikë dhe të famshëm për verën. Zjarrfikësit ngritën një barrierë anti-ndotje rreth Sea Lady II, një jaht që jepet me qera për më shumë se 90,000 dollarë në javë. Dy orë pasi filloi zjarri, zjarrfikësit thanë se kishin vështirësi të ngjiteshin në bord dhe imazhet e ndara në mediat sociale tregonin tym të zi, të dendur, rreth portit. "Jahtet përreth u zhvendosën shpejt dhe ne kemi ngritur barriera anti-ndotje", tha një zëdhënës i shërbimit të zjarrfikësve për AFP. Zyrtari shtoi se ishte "e mundur" që anija të fundosej në port. I ndërtuar në vitin 1986 dhe pasi iu nënshtrua një riparimi të fundit në vitin 2024, jahti ka tetë pjesëtarë ekuipazhi dhe mund të akomodojë 10 pasagjerë. Pesë kabinat kanë secila tualete private, sipas faqes së internetit të Charterlink, një nga agjencitë që ofron jahte me qira. Superjahte nga e gjithë bota po fillojnë të mblidhen në St Tropez dhe portet fqinje në Francë dhe Itali për sezonin e pushimeve verore, me anije me vlerë qindra miliona dollarë të ekspozuara përgjatë bregdetit të Mesdheut.