Një polic në Kinshasa, ka vrarë një student i cili nuk mbante maskë mbrojtëse gjatë realizimit të një video, e kjo ndodhi pasi vala e tretë e coronavirusit ka goditur Republikën Demokratike të Kongos, kanë raportuar mediat vendase, bazuar në dëshmitë e dëshmitarëve okularë. “Kolegu ynë Honore Shama, student i Arteve në Universitetin e Kinshasas, po realizonte një video në kuadër të një pune praktike. Ai është akuzuar për mosbindje dhe rezistencë, ku si pasojë u qëllua me armë nga afër”, tha një dëshmitar, që gjithashtu është student në Petient Odia. Mbajtja e maskës në Kongo është e detyrueshme, kurse shkelja e kësaj mase dënohet me 10.000 franga kongoleze apo pesë dollarë amerikanë. Autoritetet policore në Kinshasa dyshohet se vazhdimisht po i shqetësojnë qytetarët, duke u kërkuar para në këmbim të mosvënies së gjobave të ndryshme. Nga shpërthimi i pandemisë së coronavirusit në mars të vitit të kaluar, në Kongo janë regjistruar 47.786 raste dhe 1.020 të tjerë që kanë humbur jetën nga COVID-19.