Fryma e protestave të të rinjve ka përfshirë edhe Greqinë. Dhjetëra studentë janë mbledhur pasditen e së martës në sheshin Syntagma, në Athinë, ku kanë ngritur tenda në shenjë proteste kundër kostos së lartë të studimeve dhe vështirësive për të gjetur strehim të përballueshëm. Protesta organizohet nga Shoqatat Studentore, të cilat kërkojnë masa konkrete për të lehtësuar barrën financiare të studentëve. Krahas kampingut në shesh, ata kanë planifikuar edhe një marshim drejt Ministrisë së Financave. Me sloganin “Bashkojmë zërat tanë me studentët që po luftojnë në të gjithë Evropën”, protestuesit shprehin solidaritet me lëvizjet studentore në vende të tjera evropiane, përfshirë Francën, ku protestat vijojnë. Në fokus të kërkesave janë përmirësimi i kushteve të jetesës dhe studimit, si dhe gjetja e zgjidhjeve për rritjen e kostos së jetesës, që po vështirëson gjithnjë e më shumë përballimin e shpenzimeve nga të rinjtë.