Lidhja e Martin Çeços me litar në qafë dhe tërheqja pas makine përreth një rezervuari në Kolanec të Maliqit, tronditi jo pak opinionin publik shqiptar. Hetimet në lidhje me këtë krim pasioni, kanë marrë një tjetër rrjedhë, teksa policia ka vendosur të vërë në pranga të renë Martina Pajollari, e përfshirë në historinë e dashurisë që çoi në vrasjen e Çeços. Sipas burimeve, Policia ka arritur të sigurojë provat e mjaftueshme, që vërtetojnë se kjo shtetase ka bashkëpunuar në krim me 3 autorët e arrestuar më herët, Bleti Angjo, Valter dhe Edlir Mollaj. Të tre këta persona po vuajnë dënimin në burgun e Drenovës, për vrasjen e datës 18 qershor. Martina Pajollari dyshohet se ka qenë vajza e lidhur me viktimën, por edhe në një lidhje të dyfishtë me një burrë të martuar, Valter Mollaj, 43-vjeçari autori kryesor i vrasjes.