Sistemi kryesor i mbrojtjes nga raketat Kupola e Artë i administratës Trump do të përfshijë katër shtresa - një me bazë satelitore dhe tre në tokë - me 11 bateri me rreze të shkurtër veprimi të vendosura në të gjithë SHBA-në kontinentale, Alaskë dhe Haëaii, sipas një prezantimi me diapozitiva të qeverisë amerikane mbi projektin, të raportuar për herë të parë nga Reuters. Diapozitivat iu prezantuan 3,000 kontraktorëve të mbrojtjes në Huntsville, të Alabamës, javën e kaluar dhe zbulojnë kompleksitetin e paparë të sistemit, i cili përballet me një afat ambicioz të vendosur nga Presidenti i SHBA-së Donald Trump. Sistemi vlerësohet të kushtojë 175 miliardë dollarë, por diapozitivat tregojnë pasiguri ende mbi arkitekturën bazë të projektit sepse numri i lëshuesve, interceptorëve, stacioneve tokësore dhe vendeve ku do të vendosen raketat e nevojshme për sistemin, ende nuk është përcaktuar. Deri më tani, Kongresi ka ndarë 25 miliardë dollarë për Golden Dome në projektligjin e Trump për taksat dhe shpenzimet, të miratuar në korrik. 45.3 miliardë dollarë të tjerë janë caktuar për Golden Dome në kërkesën e tij për buxhetin presidencial të vitit 2026. I menduar si një mburojë shumështresore mbrojtëse nga raketat për Shtetet e Bashkuara, Golden Dome është frymëzuar nga Iron Dome e Izraelit, por është dukshëm më i madh për shkak të gjeografisë që do të duhet të mbulojë dhe kompleksitetit, për shkak të kërcënimeve të ndryshme me të cilat do të përballet. Sipas diapozitivave, arkitektura e sistemit përbëhet nga katër shtresa të integruara: një shtresë sensorësh dhe shënjestrimi me bazë hapësinore për paralajmërimin dhe ndjekjen e raketave, si dhe "mbrojtjen nga raketat" dhe tre shtresa me bazë tokësore që përbëhen nga interceptorë raketash, grupe radarësh dhe potencialisht edhe lazera.