Skuadrat e shpëtimit po kërkojnë për të mbijetuar dhe po vlerësojnë dëmet pasi tornadot dhe stuhitë e forta të erës kanë mbjellë shkatërrim në Tenesi, duke përmbysur makina e duke shkatërruar ndërtesa. Gjashtë persona ndërkohë kanë humbur jetën. Të paktën tre persona, mes të cilëve edhe një fëmijë, humbën jetën pasi një tornado goditi zonën e Klarksvillit, në kontenë Montgomeri në tenesin verior – thanë zyrtarët. Konteja Montgomeri ishte në fazë kërkim shpëtimi mbrëmjen e të shtunës pasi dhjetëra njerëz u trajtuan në spitale për lëndime. Imazhet e siguruara nga CNN tregonin një tornado që shkatërronte gjithcka që i dilte para, pa kursyer shtëpi e shtylla të energjisë elektrike. Stuhia do të vazhdojë drejt SHBA-së lindore duke sjellë me vete edhe rreziqe të shumta. Pas kalimit të stuhisë në Tenesi, makinat u panë me rrotat lart, pemët e shkulura me rrënjë dhe mbetjet e tjera kishin bllokuar rrugët. Shumë shtëpi kishin mbetur pa cati dhe pa mure nga era e fortë. Kryebashkiaku i Klarksvillit shpalli gjendjen e emergjencës mbrëmjen e të shtunës dhe një ndalim qarkullimi në rrugë pas orës 21. Tre viktima të tjera ndërkohë u konfirmuan në kontenë fqinje Madison. Të paktën dy tornado, të mëdha dhe të rrezikshme u konfirmuan pasditen e të shtunës në Montgomeri dhe në Gibson. E nërsa tenesi po vlerëson dëmet, akoma më shumë stuhi do të godisin pjesën lindore të shteteve të bashkuara të dielën. Ato do të arrijnë fuqi maksimale pasdite dhe do të vazhdojnë të mbjellin shkatërrim në vend.