Prokuroria Speciale e Kosovës ka ngritur akuzë ndaj një shqiptari me inicialet M.I., që dyshohet se ka qenë pjesë e forcave serbe gjatë luftës dhe ka marrë pjesë aktive në vrasjen dhe dhunimin e bashkëkombasve të tij në zonat e Gjakovës. Sipas njoftimit të prokurorisë, hetimet kanë vërtetuar se i pandehuri, gjatë periudhës 1998-1999 në fshatin Osek Hylë të Komunës së Gjakovës, duke vepruar në bashkëpunim me pjesëtarë të forcave policore serbe ka kryer vrasje, dhunime, arrestime dhe keqtrajtime ndaj popullsisë civile shqiptare që nuk ishin të përfshirë në luftë. Prokuroria ka propozuar mbajtjen e gjykimit në mungesë, sipas parashikimeve të kodit të procedurës penale, për shkak se i pandehuri gjendet në arrati. Organi akuzues nuk jep më shumë detaje në lidhje me identitetin e plotë të të akuzuarit dhe vendndodhjen aktuale të tij.