Shënohet viktima e parë pas protestave të zhvilluara në Gjermani gjatë ditëve të fundit. Sipas policisë, një 49-vjeçar ka vdekur pasi u arrestua nga oficerët të henën, gjatë protestave kundër masave të qeverisë gjermane për të parandaluar përhapjen e COVID-19. Policia tha se burri ishte ankuar për shtrëngime në krah dhe kraharor, ndërsa oficerët kontrolluan letërnjoftimin e tij në rrethin Mitte të kryeqytetit, ku mijëra protestues ishin mbledhur të dielën pavarësisht ndalimit zyrtar të demonstratave. Sipas burimeve, policët i dhanë ndihmën e parë burrit derisa mbërriti një ambulancë dhe e çuan në spital, ku më vonë ai vdiq. Një hetim është hapur për vdekjen e burrit. Rreth 600 persona u arrestuan gjatë demonstratave, të cilat patën shpërthime dhune ndërsa protestuesit kundërshtuan urdhrat për t’u shpërndarë dhe u përpoqën të thyenin linjat e policisë. Protestat pasojnë demonstrata të tjera në shkallë të gjerë kundër masave të koronavirusit në të gjithë Evropën. Mijëra njerëz kanë dalë për të protestuar ndaj kërkesave të vaksinimit në Francë gjatë tre fundjavave të fundit, ndonjëherë duke u përplasur me policinë, dhe rreth 80,000 njerëz protestuan në qytetet në të gjithë Italinë fundjavën e kaluar.