Të dielën në Shtetet e Bashkuara u shënuan të dhëna shqetësuese lidhur me pandeminë e koronavirusit, ndërsa numri i vdekjeve kaloi 350 mijë. Shtetet e Bashkuara arritën një rekord të ri sa i përket numrit ditor të infeksioneve me koronavirus, ku u regjistruan 277,346 raste të reja, sipas të dhënave të Universitetit Johns Hopkins. Nju Jorku iu bashkua Kalifornisë, Teksasit dhe Floridës me më shumë se një milion raste të regjistruara. E njëjta gjë pritet të ndodhë edhe me Illinois. Pandemia e koronavirusit vazhdon të sfidojë Shtetet e Bashkuara edhe në ditët e para të vitit të ri. Sistemi shëndetësor i Kalifornisë është i mbingarkuar. Ambulancat presin me orë për të dorëzuar pacientë të rinj. Më shumë se 4.2 milionë njerëz janë vaksinuar, por kjo është shumë më pak se 20 milionë të vaksinuar, siç është premtuar deri në fund të vitit 2020 nga administrata e presidentit, Donald Trump. Sipas të dhënave të fundit të Universitetit Johns Hopkins ShBA ka mbi 20 milionë e 430 mijë të infektuar me COVID-19 dhe mbi 350 mijë viktima që nga fillimi i pandemisë.