Kina të enjten kritikoi ashpër komentet e Sekretarit amerikan të Shtetit, Marco Rubio, mbi shtypjen vdekjeprurëse të protestuesve në Sheshin Tiananmen të Pekinit 37 vjet më parë, duke i cilësuar si "njollosje" të sistemit politik të vendit, ndërsa Tajvani i tha Kinës të përballet me historinë. Ngjarjet në dhe përreth sheshit qendror të Pekinit më 4 qershor 1989, kur trupat kineze hapën zjarr për t'i dhënë fund protestave pro-demokracisë të udhëhequra nga studentët, nuk diskutohen publikisht në Kinë dhe përvjetori nuk shënohet zyrtarisht. Rubio tha të mërkurën se censura e Pekinit nuk mund të fshijë kujtimet e sulmit ushtarak. "Ata që sakrifikuan për të mbështetur të drejtat e tyre të patjetërsueshme të lirisë së shprehjes dhe tubimit paqësor, do të shfajësohen një ditë", tha ai në një deklaratë që ndoqi praktikën e shkuar të diplomatit më të lartë të Shteteve të Bashkuara që shënonte përvjetorin. Një zëdhënës i Ministrisë së Jashtme kineze, tha se qeveria kishte dalë prej kohësh në "një përfundim të qartë" në lidhje me "trazirat politike që ndodhën në fund të viteve 1980", duke përsëritur qëndrimin e Pekinit.