Bashkimi Europian dhe SHBA janë në kërkim të një marrëveshjeje mes Kosovës dhe Serbisë, për të evituar tensionet, që mund të ndizen kur Prishtina të mirarojë vendimin për reciprocitetin e targave dhe dokumenteve në kufi. Sipas burimeve nga BE, mdërkombëtarët janë të shqetësuar që mund të eskalojë situata, nëse nuk ka një marrëveshje. Në rundin e fundit të dialogut ndërmjet Kosovës dhe Serbisë në Bruksel, më 18 gusht, një prej opsioneve për tejkalimin e tensioneve midis dy vendeve ka qenë shtyrja e zbatimit të vendimit të Qeverisë së Kosovës për targa dhe dokumente udhëtimi për një afat prej dy-tre muajsh. Burimet diplomatike zbulojnë për mediat në Kosovë se një shtyrje e tillë do të ishte e nevojshme për t’u dhënë kohë edhe serbëve në Kosovë që të përgatiten.