Ministria e Punëve të Jashtme të Serbisë ka shpallur person të padëshirueshëm sekretarin e parë të Ambasadës së Kroacisë në Serbi, Hërvoj Shnajder, vendim ky që është quajtur nga shteti kroat si një hap drejt përshkallëzimit të mëtejshëm të marrëdhënieve dypalëshe. Gjatë angazhimit të tij profesional në Serbi, siç thuhet në një deklaratë të ministrisë së jashtme serbe, sekretari i parë i ambasadës kroate, ka devijuar nga korniza e normave diplomatike dhe ka shkelur Konventën e Vjenës mbi Marrëdhëniet Diplomatike, por për këtë pretendim nuk jepen detaje. Ministria e Punëve të Jashtme të Kroacisë ka reaguar menjëherë duke shprehur keqardhje për vendimin e Serbisë dhe e ka quajtur aktin një hap drejt destabilizimit të mëtejshëm të kushteve të ndjeshme politike dhe të sigurisë rajonale. “Vendimi i Serbisë paraqet një hap drejt përkeqësimit të marrëdhënieve të ndërsjella dhe destabilizimit të mëtejshëm të kushteve të ndjeshme politike dhe të sigurisë rajonale në një kohë kur stabiliteti në juglindje të Evropës është i një rëndësie të jashtëzakonshme për të gjithë Evropën”, thuhet në komunikatën e diplomacisë kroate. Kroacia ndër të tjera ka shprehur shqetësimin e thellë se dëbimi i diplomatit kroat paraqet presion shtesë ndaj punonjësve të ambasadës kroate në Beograd, që sipas diplomacisë kroate, manifestohet posaçërisht në periudhën parazgjedhore në Serbi.