Putin po ushtron influencën e tij në Ballkan përmes strategjive politike, ekonomike, ushtarake, fetare, mediatike dhe partneriteve kryesisht me Serbinë, Malin e Zi dhe Bosnjë Hercegovinës. Në këtë përfundim ka dalë instituti holandez i marrëdhënieve ndërkombëtare, i cili analizon të gjitha hemisferat e ndikimit rus në Ballkan. Në raport thuhet se pjesa më e madhe e skenës politike serbe ka krijuar lidhje të forta me Rusinë, për shkak të pozicionimit të Moskës si anëtare e Këshillit të Sigurimit të OKB-së në mbështetje të qëndrimit serb për Kosovën. Ish ministri i brendshëm dhe kreu aktual i Agjencisë së Inteligjencës së Sigurisë të Serbisë, Aleksander Vulin konsiderohet aktori politik me ndikimin më të madh pro-rus. Mbështetja ruse për udhëheqësin e Republika Srpska, Milorad Dodik dhe lidhjet e saj me Kishën Ortodokse mbeten pika të rëndësishme të ndikimit politik të Rusisë në rajon. Në raport thuhet se mbështetja ruse për forcat politike serbe të ekstremit të djathtë ka një efekt destabilizues jo vetëm në Serbi, por edhe në vendet fqinje. Kjo është për shkak se këta politikanë në përgjithësi kanë pikëpamje pozitive për krijimin e një Serbie të Madhe siç u propagandua në vitet 1990 nga ish-presidenti serb Millosheviç. Duke mbështetur këta aktorë, Rusia minon stabilitetin dhe sovranitetin e vendeve fqinje si Kosova.