Kryeministrja e Serbisë, Ana Bërnabiç, tha se Serbia do të hetojë të gjitha rrethanat, në të cilat ka ndodhur sulmi ndaj Policisë së Kosovës, në Banjskë të Zveçanit, ndërsa ka folur për Millan Radoiçiç, i cili edhe ka marrë përgjegjësinë për organizimin e këtyre sulmeve. “Ky është shtet ligjor dhe ne do të bëjmë gjithçka që mundemi, në përputhje me ligjin dhe Kushtetutën, për të hetuar të gjitha rrethanat dhe për të vepruar siç parashikohet nga ligji”, tha Bërnabiç për Televizionin serb Prva. Ajo theksoi se, “nuk e justifikon” vrasjen e askujt, dhe as vrasjen e zyrtarit të Policisë së Kosovës, por serbët në Kosovë janë duke vuajtur nga presioni i vazhdueshëm nga autoritetet e Prishtinës, ndaj incidenti ka qenë "çështje ditësh ose edhe minutash”. Bërnabiç tha më tej se autoritetet në Serbi duhet “të mbledhin dëshmi dhe të mbrojnë të vërtetën absolute”, para takimit të Këshillit të Sigurimit të Kombeve të Bashkuara, që do të mbahet më 18 tetor.