Nëse Rusia do të arrinte një fitore të shpejtë në Ukrainë në vitin 2022, kohë kur nisi ofensivën nga jugu, veri dhe lindja ndaj Kievit, atëherë Serbia do të sulmonte Kosovën. Kështu ka deklaruar ish ministri i Mbrojtjes i Kroacisë, Ante Kotromanoviç. Ai tha se nëse Rusia do të kishte marrë Kievin në 2022 brenda një muaji nga nisja e ofensivës, atëherë Serbia do të sulmonte Kosovën bashkë me forca mercenare ruse. Duke folur për armatosjen e Serbisë dhe politikat e presidentit Aleksandër Vuçiç, ai vlerësoi se kjo ka më shumë funksion të brendshëm politik sesa strategjik. “Gjithçka që po bën tani Aleksandër Vuçiç në lidhje me armatosjen është një instrument i brendshëm, me të cilin ai forcon pozitën e tij dhe të partisë së tij, duke u përpjekur të kontrollojë të gjitha segmentet që i duhen për të qëndruar në pushtet”, deklaroi Koromanoviç Ai bëri edhe një dallim mes armatosjes së Kroacisë dhe asaj të Serbisë, duke theksuar se Kroacia vepron në kuadër të NATO-s dhe nuk përbën kërcënim për fqinjët e saj.