NIS është përfshirë në listën e sanksioneve amerikane në janar, për shkak të lidhjeve të saj me Gazprom Neft-in e Rusisë, që është sanksionuar nga perëndimi për shkak të pushtimit rus të Ukrainës. Më 28 korrik, SHBA e shtyu për herë të pestë zbatimin e sanksioneve. Presidenti i Serbisë, Aleksandar Vuçiç, tha në janar se po kërkohet “largimi i plotë i Rusisë nga pronësia e NIS-it”, për çka do të duhej një ndryshim pronësie. Më 14 mars, NIS i paraqitiDepartamentit amerikan të Thesarit një kërkesë për heqjen nga lista e sanksioneve, ndërkohë që Gazprom Neft ka transferuar rreth 5 për qind të pjesës së vet te Gazprom, një kompani ruse që nuk është e përfshirë në sanksionet perëndimore. Aktualisht, Gazprom Neft ka 44.9 për qind të aksioneve në NIS, shteti i Serbisë ka 29.9 për qind të aksioneve, ndërsa kompania Gazprom rreth 11 për qind. Aksionet e tjera u takojnë aksionerëve më të vegjël. NIS është e vetmja kompani në Serbi që merret me kërkimin, prodhimin dhe përpunimin e naftës si dhe prodhimin e gazit natyror. Ekspertët thonë se Serbia mundet ta detyrojë rusinë që të shesë paketën e saj të aksioneve në NIS por nuk e bën këtë për interesa politike.