“Kemi ardhur nga Kosova. Vullnetarisht. Askush nuk na organizoi”, janë deklaratat e serbëve të Kosovës, të cilët janë, mbledhur në Parkun e Pionerit në Beograd, ku është ngritur një kamp i studentëve, që kundërshtojnë bllokadat e fakulteteve. “Ne kemi ardhur për të mbështetur presidentin Aleksandar Vuçiq, i cili është gjithmonë me ne”, është shprehur një qytetar, ndërsa ka theksuar se do të qëndrojnë aty derisa të jetë e nevojshme. Sipas Radio Evropa e Lirë, serbë nga zona të ndryshme të Kosovës, si Shtërpca, Graçanica, Mitrovica e Veriut, Leposaviqi e Zubin Potoku, kanë shkuar në kampin para Presidencës serbe. Në mesin e tyre ka edhe punonjës të institucioneve serbe, që besohet se u është premtuar rritje e pagave mujore. Sipas REL, shumë nga serbët janë ogranizuar për të shkuar me autobusë dhe disa me makinat e tyre private.