Rreth 45 kilogramë e 500 gramë heroinë është sekuestruar në një kamion mbrëmjen e së hënëns në portin e Durrësit. Policia ka bërë me dije se në kuadër të operacionit policor Portëz, janë vënë në prana Arian Cerma, 45 vjec banues në Durrës, pronari I mjetit ku u gjet droga si dhe drejtuesi I tij Olfert Duda 36 vjec banues në Fier. Sipas policisë, këta shtetas kanë mohuar se ishin në dijeni për sasinë e drogës në kamion. Task Forca permanente që operon në Portin e Durrësit, ka ushtruar një kontroll të imtësishëm në kamionët në hyrje dhe në dalje. Gjatë një kontrolli në dalje në vijën e dytë, në kamionin tip “Scania” i ngarkuar me krom, me destinacion shtetin Italian, u gjetën të fshehura 43 pako të mbështjella me natriban brenda të cilave kishte lëndë narkotike të dyshuar heroinë, me peshë totale 45 kilogramë e 500 gramë. Autoritetet vijojnë punën nën drejtimin e Prokurorisë së Rrethit Gjyqësor Durrës, për zbardhjen e plotë të këtij rasti, identifikimin dhe arrestimin e personave të tjerë të përfshirë në këtë veprimtari kriminale. Materialet hetimore i kaluan Prokurorisë Pranë Gjykatës së Shkallës së Parë Durrës, për veprën penale “Trafikimi i narkotike”, kryer në bashkëpunim.