Shenja jete përtej sistemit tonë diellor mund të shihen brenda dy apo tre vitesh, kanë thënë ekspertët, pasi kanë rishikuar llojet e planeteve që mund të jenë të banueshëm. Kërkuesit kanë kërkuar kryesisht për planete të përmasave të ngjashme, me temperatura të ngjashme dhe me përbërje atmosferike si ajo e tokës. Por astronomët e universitetit të Kembrixhit, besojnë se mund të ketë shumë më tepër mundësi premtuese pas studimeve të fundit që tregojnë se një mini neptun, me rreze dy herë më të madhe se e tokës dhe ndoshta edhe tetë herë më të madhe, mund të jetë i banueshëm. Ata tani kanë identifikuar një klasë të re ekzoplanetësh të banueshëm, të quajtur planetë hycean, të nxehtë, të mbuluar me oqeane dhe me atmosfera të pasura me hidrogjen, që janë më të shumtë në numër dhe më të vëzhgueshëm se sa planetet e ngjashëm me tokën. Mini Neptuni, i njohur si K2-18b, është njëri prej tyre dhe mund të ekzistojnë edhe shumë të tjerë si ai. ‘Hyceanët’ janë në thelb botë ujore me atmosfera të pasura me hidrogjen – thotë doktor Niku Madhusudhan, autor i kërkimit nga universiteti i Kembrixhit. Ai thotë se fokusimi tek këta planetë mund të përshpejtojë përpjekjet për të gjetur jetë përtej tokës.