Ervin Salianji i është drejtuar Gjykatës së Lartë me kërkesën për pezullimin e ekzekutimit të menjëhershëm të vendimit të gjykatës së Apelit, që la në fuqi dënimin e tij me një vit burg. Salianji përfaqësohet në Gjykatën e Lartë nga avokati Ledio Braho. Në kërkesë ai thotë se ekzekutimi i menjëhershëm i vendimit me dënim ka pasoja shumë të rënda për të dënuarin dhe sjell mbarimin e mandatit të deputetit dhe pengon kandidimin në zgjedhjet e ardhshme parlamentare. Mes argumentave të mbrojtjes paraqitet fakti se Komisioni Qendror i Zgjedhjeve nuk është shprehur për mandatin e Ervin Salianjit dhe Gjykata e Lartë duhet ta pezullojë vendimin pasi cenon në mënyrë të drejtpërdrejt mandatin e deputetit të fituar falë votave të qytetarëve. Kërkesa shoqërohet bashkë me dokumentacionin përkatës, me përjashtim të vendimit të formës së prerë të Gjykatës së Apelit, të cilin avokatët thonë se nuk u është dorëzuar, as varianti i shkurtuar dhe as vendimi i plotë i kësaj gjykate.