Rusia tha të shtunën se forcat e saj në lindje të Ukrainës kanë marrë nën kontroll dy fshatra në rajonin e Donjeckut dhe se kanë rritur presionin në fushëbetejë. Ofensiva ka ardhur në një kohë kur udhëheqësit botërorë po tentojnë që të arrihet një zgjidhje diplomatike për t’i dhënë fund konfliktit. Forcat ruse raportohet se po përparojnë ngadalë në rajonin lindor të Ukrainës, duke iu afruar vijës kyç të mbrojtjes të Kievit. Ministria ruse e Mbrojtjes shkroi në Telegram se ushtria ka marrë nën kontroll fshatrat Sredenje dhe Kleban-Bik duke rritur ndjeshëm avancimin drejt zonave të tjera. Të premten, Rusia njoftoi se trupat e saj kishin marrë nën kontroll tri fshatra në rajonin e Donjeckut, rajon të cilin ajo pretendon ta ketë aneksuar në shtator të vitit 2022. Përparimet e fundit ruse vijnë ndërsa shpresat për një samit mes presidentëve rus dhe ukrainas po zbehen – një zgjidhje që presidenti amerikan, Donald Trump, ka kërkuar si pjesë e përpjekjeve të tij për t’i dhënë fund konfliktit.