Rusia pretendon se është gati të zhvillojë bisedime me Ukrainën "pa asnjë parakusht", thotë agjencia franceze e lajmeve AFP duke cituar mediat shtetërore ruse, pasi presidenti amerikan Donald Trump vuri në dyshim gatishmërinë e udhëheqësit rus Vladimir Putin për të ndaluar ofensivën trevjeçare. Por më pas në komente të tjera, të raportuara pothuajse njëkohësisht nga AFP, diplomati më i lartë i Rusisë tha se njohja e pretendimeve të saj mbi pesë rajone ukrainase, përfshirë Krimenë, është "e domosdoshme" për bisedimet që do të synonin zgjidhjen e konfliktit. "Njohja ndërkombëtare e pronësisë së Rusisë mbi Krimenë, Sevastopolin, Republikën Popullore të Donetskut, Republikën Popullore të Luhanskut, rajonet e Khersonit dhe Zaporizhzhias është e domosdoshme", tha ministri i jashtëm Sergei Lavrov duke përdorur emrat e Kremlinit për rajonet ukrainase. Në intervistën, të botuar në internet, Lavrov tha gjithashtu se topi "nuk është në fushën e Rusisë", ndërsa u përpoq të ushtronte presion mbi Kievin për të bërë lëshime në mënyrë që të përparonin bisedimet. Edhe zëdhënësi i kremlinit, Dimitry Peskov, tha të hënën se Rusia po priste një sinjal nga Ukraina për të nisur biseidmet për t’i dhënë fund luftës, por nuk kishte parë shenja në këtë drejtim. "Sinjalet duhet të vijnë nga Kievi, ose të paktën Kievi duhet të ndërmarrë disa veprime në këtë drejtim. Ata kanë një ndalim ligjor për këtë. Por deri më tani nuk shohim ndonjë veprim. Ndërkohë, Moska do të vazhdojë "operacionin e saj të posaçëm ushtarak", tha ai. Kremlini tha të premten e kaluar se mundësia e bisedimeve të drejtpërdrejta ishte ngritur gjatë një takimi tre-orësh midis Presidentit Vladimir Putin dhe të dërguarit të SHBA-së Steve Ëitkoff. Moska dhe Kievi nuk kanë zhvilluar negociata të drejtpërdrejta që nga marsi i vitit 2022, menjëherë pas fillimit të luftës në shkallë të plotë të Rusisë në Ukrainë. Më vonë atë vit, Presidenti ukrainas Volodymyr Zelenski miratoi një dekret që përjashtonte negociatat me Putinin, pasi Rusia pretendoi katër rajone të Ukrainës si të vetat.