Ushtritë ruse dhe bjelloruse do të zhvillojnë stërvitje të përbashkëta strategjike në Bjellorusi nga 12 deri më 16 shtator, tha Ministria e Mbrojtjes e Bjellorusisë të martën. Qëllimi i stërvitjeve është të testojë aftësitë e Rusisë dhe Bjellorusisë dhe "të garantojnë sigurinë ushtarake të vendeve dhe gatishmërinë e tyre për të zmbrapsur një agresion të mundshëm", citoi ministria Gjeneral Majorin Valery Revenko. Presidenti ukrainas Volodymyr Zelenski paralajmëroi më herët këtë vit, pa dhënë detaje dhe as prova, se Rusia po "përgatit diçka" në Bjellorusi këtë verë nën maskën e stërvitjeve ushtarake rutinë. Në një intervistë me revistën Time javën e kaluar, Presidenti bjellorus Alexander Lukashenko tha se kishte vendosur të ndryshonte vendndodhjen e stërvitjeve të përbashkëta ushtarake larg kufijve perëndimorë të Bjellorusisë me vendet e Bashkimit Evropian, duke përmendur shqetësimet e sigurisë të ngritura në Poloni dhe vendet baltike. Lukashenko e quajti idenë që Bjellorusia do t'i përdorte stërvitjet për të sulmuar tre vendet baltike dhe Poloninë, një "absurditet të plotë". Gjeneral Majori Revenko tha se stërvitjet ruso-bjelloruse po "përdoren si pretekst për militarizim të vazhdueshëm" në vendet fqinje të NATO-s, duke përmendur stërvitjet e ardhshme të përbashkëta të NATO-s në Poloni që përfshijnë të paktën 34,000 trupa. Bjellorusia, aleati më i ngushtë i Rusisë, ka parë marrëdhëniet e saj me fqinjët perëndimorë dhe Ukrainën të përkeqësohen gjatë viteve të fundit pasi Moska përdori territorin bjellorus si një trampolinë për sulmin ndaj Kievit në shkurt 2022.