Zyra e prokurorit të përgjithshëm në Ukrainë, tha se kishte nisur një hetim për vrasjen e një grupi të burgosurish ukrainas të luftës nga forcat ruse. Këto të fundit, mendohet se i qëlluan për vdekje ushtarët e paarmatosur ukrainas në rajonin e Bakhmutit, në donetsk, të shtunën. Një hetim paraprak ka nisur në lidhje me shkeljen e supozuar të ligjit dhe zakonit të luftës, në kombinim me vrasjen e paramenduar, pasi një video u shfaq në mediat sociale ku shihej ekzekutimi i trupave të dorëzuara ukrainase. “Më 24 shkurt 2024, një video regjistrim u postua në një kanal në telegram, ku shiheshin ushtarët rusë që qëllonin kundër shtatë trupave ukrainase gjatë një sulmi mbi pozicionet tona mes fshatrave Ivanivske dhe Khromove, në Donetsk”, tha zyra e prokurorit. “Pamjet me dronë tregonin se pjesëtarë të forcave të armatosura ruse, në fillim i urdhëruan mbrojtësit tanë të dalin nga llogorja. Më pas, kur të gjithë mbrojtësit tanë ishin mbledhur në një vend, u zhvendosën pak metra më tutje dhe armiku hapi zjarr mbi ta”, tha zyra. “Ushtria e vendit agresor, vrau ushtarë ukrainas të paarmatosur, duke injoruar normat e ligjit humanitar ndërkombëtar”. Ushtarët ukrainas duket se po dorëzoheshin kur u vranë, tha edhe komisioneri ukrainas për të drejtat e njeriut, Dmytro Lubinets, në një mesazh personal të ndarë në mediat sociale. “Ata kishin ngritur duart lart, duke treguar se ishin të paarmatosur dhe nuk përbënin asnjë rrezik. Rusët, supozohet se duhet ti merrnin ata robër, por pa mëshirë ata hapën zjarr mbi ta”, tha Lubinets.