Rumania ka thënë se do të blejë sistemin e mbrojtjes nga raketat Iron Dome që përdoret nga Izraeli për të mbrojtur vendin e NATO-s nga raketat me rreze të shkurtër veprimi. Ministri i mbrojtjes Ionuț Moșteanu i tha televizionit rumun se këtë vit do të nënshkruhet një marrëveshje me prodhuesin Rafael "për të mbrojtur qytetet e vendit". Ai tha se imazhet e sistemit që mbron Tel Avivin gjatë sulmeve iraniane me raketa dhe dronë kanë treguar qartë efikasitetin e tij. "Do të na mbrojë edhe ne. Qofshin aeroporte, baza ushtarake apo, Zoti na ruajt, qytetet tona", tha ministri. Rumania ka ngritur alarmin për valën e dronëve dhe raketave ruse që kanë rënë në territorin e saj gjatë pushtimit të Ukrainës, me të cilën kufizohet. Sipas zyrtarëve, shkeljet e përsëritura të hapësirës ajrore nga dronët rusë në Ukrainë, e kanë detyruar bukureshtin të zbatojë një sistem më të fortë parandalimi. Në shtator 2024 u raportua se mbetjet nga raketat dhe dronët nga lufta në Ukrainë po binin në Rumani. Pushtimi rus i Ukrainës ka shkaktuar alarm mes anëtarëve të NATO-s në Evropë dhe Bukureshti ka ngritur vazhdimisht avionët luftarakë në fluturim pasi dronët kanë shkelur hapësirën e tij ajrore.