Kryetari i Partisë Demokratike, Lulzim Basha ka prezantuar planin e PD për turizmin, ku u angazhua të rrisë kontributin e drejtpërdrejtë nga turizmi në ekonominë tonë nga 8 në 10% si dhe për rritjen e punësimit përmes turizmit. “Angazhohem të dyfishojmë kapacitetet akomoduese. Duke hapur kështu dyert për më shumë turistë. E për pasojë do të kemi më shumë vende të reja pune. Angazhohem të punoj për të rritur kohëzgjatjen e sezonit turistik, përmes diversifikimit të ofertave turistike. Kështu ne do të dyfishojmë kohën e qëndrimit të turistëve të huaj në vendin tonë. Do t’u japim atyre më shumë arsye stimuluese për ta vizituar Shqipërinë. Si rrjedhojë e këtyre masave qeveria e re angazhohet të rrisë numrin e turistëve të huaj me 15% në vit!“ Duke akuzar qeverisjen aktuale për mos mbajtjen e premtimve, kreu I opozitës kërkoi nga ata largimin, pasi sipas tij, nëse dikush nuk i plotëson angazhimet, nuk meriton të rrijë në detyrë. Ata kanë kuptuar pikërisht atë që kjo qeveri nuk e ka bërë kurrë: nëse investon në mënyrën e duhur, nëse vendos të kujdesesh për njerëzit dhe jo për veten, mund të arrish gjëra të mëdha! Siç ju kam thënë gjatë javëve të fundit, këto që po ju prezantojmë nuk janë premtime boshe fushate. Janë angazhimet tona, janë angazhimi im ndaj jush.