“Ky është kapitulli më sfidues i negociatave dhe ky është aspekti më sfidues i anëtarësimit tonë në Bashkimin Europian.” Për të përmbushur detyrat e Brukselit, qeveria shqiptare do të reformojë menaxhimin e integruar të Mbetjeve. Ndërhyrjet në ligj do të mundësojnë krijimin e një operatori të trajtimit të mbetjeve, një shoqëri aksionare, e ngjashme me OSHEE-në, që pas krijimit do i kthejë bashkitë në ‘kliente’ për marrjen e këtij shërbimi. “Është projektligji i ri për menaxhimin e integruar të mbetjeve, ku kemi parashikuar krijimin e operatorit kombëtar të trajtimit të mbetjeve, një institucion, një ndërmarrje e re që do jetë në dispozicion të të gjithë republikës, në dispozcion të pushtetit vendor, qytetarëve, misionit për anëtarësimin në BE, duke përqëndruar gjithë procesin e grumbullimit dhe menaxhimit të mbetjeve, që nuk do jetë më një process i menaxhuar nga bashkitë. Bashkitë do jenë klientë, njësoj siç janë klientë të operatorëve të tjerë, për të tjera shërbime.” Territori i Shqipërisë do të ndahet në dhjetë zona të menaxhimit të mbetjeve. Ndërhyrjet ligjore do të ngarkojnë me përgjegjësi dhe detyrime ligjore, bizneset që do të duhet të ndjekin dhe gjurmojnë çdo mbetje që del nga aktiviteti i tyre, çka do të rrisë kostot për subjektet private.