Kryeministri Edi Rama iu rikthye premtimit të bërë në mars të këtij viti për të ngritur flotën tonë ajrore zjarrfikëse. Rama tha se puna do të nisë me dy avionë, që do të vijnë se shpejti, por se vetëm avionët nuk janë zgjidhje. “Avionët nuk janë magjistarë ata janë ndihmës të fuqishëm që nuk na kanë munguar falë mekanizmit evropian, por nuk janë asesi të plotfuqishëm. 22 avionë të gjeneratës së fundit nuk e penguan dot përbindëshin e flakëve ta digjte dhe përcëllonte gjirin e Izmirit duke hapur një plagë të dhimbshme në tokën e Turqisë mike. Avionët janë krah i fuqishëm në betejë edhe në do të kemi së shpejti flotën e avionëve tanë që do të nisë të ndërtohet me dy avionë zjarrfikës por magjia është bashkërendimi dhe sakrifica në tokë”. Kreu i Qeverisë foli edhe për vendime të drejtësisë që sipas tij, janë marrë në favor të zjarrvënësve. Rama i bëri këto deklarata gjatë një ceremonie ku u nderuan efektivët e policisë dhe zjarrfikës për punën e bërë në betejë me flakët.