Kryetari i Partisë së Lirisë, Ilir Meta, ka reaguar ashpër pas vendimit të gjyqtarit Erjon Çela për të mos e liruar nga masa e sigurisë. Meta e akuzon gjyqtarin se po vepron si “noter i SPAK-ut” dhe jo si përfaqësues i drejtësisë. Në deklaratën e tij, Meta përmend disa nga dëshmitarët, dikur ish-bahskëpunëtorë të ngushtë të tij, duke thënë se një pjesë janë shndërruar në rilindas. Ai përmend Endrit dhe Erion Brahimllari, Elena Gaçe, Mirela Merko dhe Luan Ramën, të cilët, sipas tij, janë të shkëputur prej kohësh nga partia ose të lidhur me Partinë Socialiste. përveç Z. Petrit Vasili, asnjë tjetër nga dëshmitarët e SPAK-ut nuk është anëtar i Partisë së Lirisë sot. 1. Endrit Brahimllari, edhe falë Dumanit, dihet botërisht se është bërë “rilindas” i thekur dhe ishte në listën e deputetëve të Partisë Socialiste. 2. Erion Brahimllari, është shkarkuar nga Partia e Lirisë që në Janar 2024 për veprimtari të dyshimtë dhe është pjesë e “Rilindjes”. Madje ishte edhe numërues i votave të saj në zgjedhjet e fundit për Partinë Socialiste. 3. Elena Gaçe, ish-financerja e LSI për 20 vite që nga themelimi është larguar në mënyrë të çuditshme në pranverë të vitit 2024 dhe pa dorëzuar detyrën e saj . 4. Znj. Mirela Merko, ish-kryefinanciere e LSI para 10 vitesh. Prej 6 vitesh nuk është pjesë e LSI, por është pjesë e administratës publike. 5. Z. Luan Rama, ish-Sekretar i Përgjithshëm i LSI, i vetëlarguar që në gusht 2021. Meta ka akuzuar sërish SPAK-un dhe kreun e tij Altin Dumanin për një proces që sipas tij është i motivuar politikisht dhe që, synon të mbajë të penguar opozitën.