Zgjedhjet parlamentare janë vetëm dy ditë larg, dhe nga dje ka nisur shpërndarja e materialeve zgjedhore në të gjitha Komisionet Zonale të Administrimit Zgjedhor. Orgazimi i këtyre zgjedhjeve i ka kushtuar buxhetit të shtetit një faturë të majme financiare dhe janë 40 milionë dollarë fond i akorduar KQZ, duke i bërë ato zgjedhjet më të shtrenjta në historinë e këtyre 30 viteve të pluralizimit. Zakonisht buxheti i shtetit ka shpenzuar 7-8 milionë dollarë për organizimin në tërësi të zgjedhjeve, por elementët e sigurisë që iu shtuan procesit shtuan në shifra të padëgjuara më parë faturën. Vetëm vënia në jetë e projektit pilot për identifikimin elektronik të zgjedhësve për një njësi administrative në Tiranë ndryshoi tërësisht faturën dhe KQZ kërkoi 24 milionë dollarë për financimin e tij. Vetëm për shpenzimet administrative që diktohen nga ndryshimet e ligjit zgjedhor qeveria ka akorduar 14.5 milion dollarë. Një kosto tjetër e shtuar që ka rënduar buxhetin janë dhe instalimi i sistemit të kamerave në të gjitha qendrat e votimit dhe vendet e numërimit të votave. Këto janë disa nga elementet teknike të sigurisë dhe risitë në këto zgjedhje që u vendosën pas disktumeve të stërzgjatura për reformën zgjedhore.