Qeveria britanike po rrit shpenzimet e mbrojtjes për të ndihmuar në ndërtimin e forcave evropiane përballë një rusie të rrezikshme, por dekada të tërash shkurtimi të financimeve dhe problemeve me rekrutimin kanë dëmtuar ndjeshëm forcat e armatosura britanike. Kryeministri britanik Keir Starmer ka njoftuar një rritje të madhe për buxhetin e mbrojtjes të Mbretërisë së Bashkuar, nga 2.3% që është aktualisht në 2.5% të Produktit të brendshëm bruto duke filluar nga viti 2027. Rritja e shpenzimeve do të sigurohet duke shkurtuar buxhetin e ndihmës ndërkombëtare britanike, ruajtja e të cilit ishte një angazhim kryesor për qeveritë e mëparshme. Në terma afatgjatë, tha Starmer, rritja e shpenzimeve do t’i cojë shpenzimet e mbrojtjes së Mbretërisë së Bashkuar në 3% të produktit të brendshëm bruto. Kjo shifër është sidoqoftë më pak se 5% që Presidenti i SHBA Donald Trump ka kërkuar nga partnerët e NATO-s për mbrojtjen, por shpresa e qeverisë së Mbretërisë së Bashkuar do të jetë që shpenzimet shtesë mund të zbusin një pjesë të zemërimit të tij ndaj aleancës, si dhe të forcojnë mbështetjen britanike për Ukrainën në veçanti. Duke njoftuar shpenzimet e reja, Starmer tha se pushtimi i Ukrainës i kishte dhënë fund një epoke paqeje në Evropë që filloi me rënien e Murit të Berlinit dhe i bëri thirrje publikut britanik të kuptojë se mbrojtja e Ukrainës dhe Evropës është e pandashme nga siguria e brendshme.