Kremlini tha të hënën se nuk mund ta përjashtonte mundësinë që protestat antiqeveritare në Serbi, një aleate e ngushtë e Rusisë, mund të jenë një përpjekje për 'revolucion me ngjyra', por moska është e sigurt se udhëheqja serbe mund të rivendosë qetësinë. Policia serbe u përlesh të shtunën me protestuesit antiqeveritarë që kërkonin zgjedhje të parakohshme dhe fundin e sundimit 12-vjeçar të Presidentit Aleksandar Vuçiç. "Pavarësisht faktit se Serbia është nën një presion të paparë, nuk mund të përjashtojmë mundësinë se atje po përdoren metoda të njohura për të provokuar revolucione me ngjyra", u tha gazetarëve zëdhënësi i Kremlinit Dmitry Peskov. "Nuk kemi dyshim se udhëheqja aktuale serbe do të jetë në gjendje të rivendosë ligjin dhe rendin në një të ardhme shumë të afërt", shtoi ai. Rusia tradicionalisht e ka konsideruar Vuçiçin si një aleat të ngushtë dhe udhëheqësi serb ishte në Moskë më 9 maj për të parë paradën ushtarake në Sheshin e Kuq të mbajtur për të përkujtuar fitoren sovjetike ndaj Gjermanisë naziste në Luftën e Dytë Botërore. Muaj të tërë protestash në të gjithë Serbinë, përfshirë mbylljen e universiteteve, e kanë tronditur Vuçiçin, një populist, mandati i dytë i të cilit përfundon në vitin 2027, kur janë planifikuar edhe zgjedhjet parlamentare. Vuçiç thotë se "fuqi të huaja" të paspecifikuara qëndrojnë pas protestave dhe se protestuesit kanë tentuar të "rrëzojnë Serbinë", por kanë dështuar.