Koreja e Veriut është historia më e habitshme e suksesit ekonomik në botë, shkruan Financial Times në një reportazh të gjatë të saj nga vendi i izoluar komunist. Ekonomia e saj po lulëzon në mënyra që nuk janë parë prej vitesh, e ndihmuar nga shitja e armëve dhe vendosja e trupave në Rusi, furnizimet dhe financimi nga Kina, dhe aftësia për të shpërfillur sanksionet ndërkombëtare për të importuar më shumë energji, komponentë dhe materiale. Udhëheqësi kinez Xi Jinping udhëtoi në Korenë e Veriut këtë javë në udhëtimin e tij të parë jashtë vendit, këtë vit. Regjimi i Kim Jong Unit i mbylli kufijtë e tij gjatë pandemisë së koronavirusit dhe që atëherë, ai është rihapur vetëm për disa të huaj të zgjedhur, përfshirë udhëtarë dhe zyrtarë rusë e perëndimorë. Këta vizitorë përshkruajnë një Kore të Veriut të panjohur më parë dhe veçojnë kryeqytetin e saj, Phenianin, ku jeton Kim Jong un dhe elita e vendit.