Avionët ushtarakë dhe tanket izraelite bombarduan periferitë lindore dhe veriore të qytetit të Gazës gjatë natës mes të shtunës dhe të dielës, duke shkatërruar ndërtesa dhe shtëpi, thanë banorët, ndërsa udhëheqësit izraelitë u zotuan të vazhdojnë me një ofensivë të planifikuar në qytet. Dëshmitarët raportuan shpërthime pa ndërprerje gjatë natës në zonat Zeitun dhe Shejaia, ndërsa tanket bombarduan shtëpitë dhe rrugët në lagjen Sabra aty pranë dhe disa ndërtesa u hodhën në erë në qytetin verior të Xhabalias. Ushtria izraelite tha të dielën se forcat e saj janë rikthyer në luftime në zonën e Xhabalias në ditët e fundit, për të hedhur në erë tunelet e militantëve dhe për të forcuar kontrollin e zonës. Ajo shtoi se operacioni atje "mundëson zgjerimin e luftimeve në zona të tjera dhe parandalon terroristët e Hamasit të kthehen për të vepruar në këto zona". Izraeli miratoi një plan këtë muaj për të marrë kontrollin e qytetit të Gazës, duke e përshkruar atë si bastionin e fundit të Hamasit. Nuk pritet që pushtimi i plotë të fillojë për disa javë, cka lë hapësirë për ndërmjetësit, Egjiptin dhe Katarin, që të përpiqen të rifillojnë bisedimet e armëpushimit mes palëve. Ministri i Mbrojtjes i Izraelit, Israel Katz, të dielën u zotua të vazhdojë me ofensivën, e cila ka ngritur alarmin jashtë vendit dhe kundërshtime brenda vendit. Të premten, Katz tha se Qyteti i Gazës do të rrafshohet nëse Hamasi nuk pranon të dorëzojë armët sipas kushteve të Izraelit dhe të lirojë të gjithë pengjet.