Diplomatja më e lartë e Bashkimit Evropian ka paralajmëruar kundër shtyrjes së Ukrainës për t'i dhënë territore Rusisë si pjesë e një marrëveshjeje të ardhshme paqeje. Duke folur në një intervistë për BBC, Kaja Kallas tha se lejimi i Rusisë të mbajë territoret ukrainase është një "kurth në të cilin Putini dëshiron që Perëndimi të bjerë". Rajoni i Donbasit në Ukrainën lindore është kërkuar prej kohësh nga Rusia, me një agresion ushtarak që detyroi 1.5 milion ukrainas të largohen gjatë dekadës së fundit. Ukraina ka refuzuar vazhdimishtt’ia japë Donbasin Kremlinit në këmbim të paqes, megjithëse Trump theksoi nevojën për "shkëmbim territoresh". Kallas, që është vendosur në "listën e të shumëkërkuarve" të Kremlinit, foli gjithashtu edhe për garancitë e sigurisë "të besueshme dhe të forta" për Ukrainën. Ajo pranoi se nuk kishte shumë "hapa konkretë" për një forcë penguese në këtë fazë të negociatave. "Garancia më e fortë e sigurisë është një ushtri e fortë e Ukrainës", tha ajo, duke nënvizuar rëndësinë e vendosjes së garancive "jo vetëm në letër". Ajo tha se u takon shteteve anëtare të "koalicionit të të vullnetshmëve" të përcaktojnë saktësisht se me çfarë mund të kontribuojnë dhe se ende nuk ishte e qartë se në çfarë kapaciteti do të vepronin këto forca. Kallas tha se Putin mori gjithcka që donte në samitin e alaskës, me presidentin amerikan Donald Trump, dhe kjo do të ndikojë në interesin e tij për të negociuar një marrëveshje paqeje. "Ai u prit shumë mirë dhe donte që të mos vendoseshin sanksione, gjë që edhe e arriti. Putini thjesht po qesh, nuk po ndalon vrasjet, por po i shton ato", tha Kallas. "Po harrojmë që Rusia nuk ka bërë asnjë lëshim të vetëm".