Prokuroria Themelore në Ferizaj ka kërkuar masën e paraburgimit për 17 vjeçarin me iniciale R.B., si të dyshuar për vrasjen e rreshterit policor Muhamed Lika. Sipas Prokurorisë, i mituri më datë 1 prill, rreth orës 23:00, në Kaçanik, në rrugën "Idriz Seferi", përkatësisht në katin e II-të të hyrjes së ndërtesës, në bashkëpunim me 6 shtetas të tjerë, kanë kryer vrasjen e rreshterit Muhamed Lika. Sipas njoftimit të prokurorisë, I mituri ka ndjekur viktimën, pas përfundimit të orarit të punës, rrugës për në banesën e tij. Sipas prokurorisë, I mituri ishte shoqëruar me makinë nga bashkëpunëtorët në vrasje, dëri në hyrjen e banesës së rreshterit. I mituri mësohet se ka shkuar pas viktimës, dhe me t’u takuar, I është drejtuar me armë rreshterit dhe ka hapur zjarr. Sipas Prokurorisë, rreshteri Muhamed Lika është dëguar në Qendrën e Mjekësisë Familjare në Kaçanik dhe nga ekipet mjekësore është konstatuar vdekja e tij, e cila ka ardhur si pasojë e plagëve të marra nga plumbat e armës së zjarrit. 17 vjeçari akuzohet për veprën “Vrasje e rëndë” .