Një hetim i BBC ka zbuluar e dokumentuar një skemë të autoriteteve greke, të cilat rekrutojnë emigrantë të ndryshëm, duke i trajtuar si “mercenarë” dhe duke i detyruar të shtyjnë me forcë emigrantë të tjerë përtej kufirit tokësor me Turqinë. Sipas dokumenteve dhe dëshmive, ky proces është urdhëruar dhe mbikëqyrur nga oficerë të lartë, ndërsa praktika e kthimeve mbrapsht, e konsideruar e paligjshme sipas ligjit ndërkombëtar, dyshohet se po ndodh të paktën që nga viti 2020. Dëshmitë flasin për dhunë të rëndë dhe abuzime sistematike ndaj emigrantëve, përfshirë dhunë, grabitje, zhveshje dhe madje sulme seksuale. Raporte të pavarura dhe pamje të siguruara tregojnë se grupe burrash të maskuar, të udhëzuar nga autoritetet, kanë ndaluar emigrantët dhe i kanë detyruar të kthehen në Turqi. Një raport i Frontex konfirmon se në disa raste ata janë trajtuar në mënyrë çnjerëzore dhe janë deportuar në shkelje të të drejtave të njeriut.