Kompania e robotëve Boston Dynamics shpenzoi një vit e gjysmë për të krijuar disa robotët që kërcejnë me ritëm si të ishin njerëz. Kjo është arritja e fundit e njeriut që ka krijuar robotët më të përparuar në botë. Marc Raibert, themeluesi i kompanisë Boston Dynamics bashkë me ekipin e tij shpenzoi shumë kohë për koreografi, simulim, programim dhe avancim të makinerive. Rezultati janë robotët që mund të vallëzojnë, lëvizjet e të cilëve janë shumë të ngjashme me ato të njeriut. “Boston Dynamics” publikoi videon ku shihen dy robotë humanoidë, Spot që i ngjason një qeni dhe Handle një robot me rrota që përdoret për lëvizjen e dërgesave në një depo, ndërsa vallëzojnë me hitin e vitit 1962 “Do You Love Me” nga Contours. “Kemi programuar lëvizje të ndryshme. Dhe në fund koordinuam të gjithë robotët në mënyrë që makineritë të hynin, performonin dhe dilnin nga skena. Duhej të kuptonim se ku do të shkonte kamera në mënyrë që të filmonim”, shpjegon themeluesi i Boston Dynamics, Marc Raibert. Ai shton se donin të krijonin dicka që të dukej sa më reale. Kjo është diçka e re për kompaninë që për vite të tëra merret me ndërtimin e robotëve që kanë aftësi për të ecur, ngjitje në terrene të vështira, të kapin sende me duar e të përdorin sensorët.