Sirenat e sulmit ajror u dëgjuan mbi Kiev të hënën, përpara bisedimeve shumë të pritura në Uashington midis Presidentit ukrainas Volodymyr Zelensky dhe udhëheqësit amerikan Donald Trump. Forca ajrore ukrainase tha në mediat sociale se një alarm ajror u aktivizua në të gjithë vendin sepse një MiG-31 rus u zbulua në fluturim, me gjasë i armatosur me raketa hipersonike Kinzhal që Moska i ka përdorur edhe më parë në sulme. Sipas zyrtarëve ushtarakë të ukrainës, ai që pasoi ishte sulmi më i madh ajror ndaj ukrainës që nga korriku. Forca Ajrore Ukrainase tha se Rusia nisi 270 dronë dhe 10 raketa gjatë natës, që sipas një llogaritjeje të CNN është edhe sulmi më i madh ajror që nga 31 korriku. Katër raketa dhe 16 dronë canë mbrojtjen ajrore të Ukrainës, thuhej në deklaratën e forcave ajrore. Sulmet e Rusisë vranë gjithsej tetë persona dhe plagosën 54 të tjerë në të gjithë Ukrainën në 24 orët e fundit deri të martën në mëngjes. Pesë persona u vranë nga sulmet ruse në qytetet pas vijave të frontit në rajonin e Donetskut, ndërsa tre u vranë dhe 33 u plagosën në sulmet ruse në qytetin e Zaporizhias, sipas autoriteteve ushtarake në të dy rajonet. Sulmet ruse plagosën gjithashtu civilë në Kharkiv, Kherson, Dnipropetrovsk dhe Nikopol. Të paktën 1,471 familje dhe 119 biznese humbën ndërkohë energjinë elektrike të martën pas sulmit masiv rus në rajonin e Poltavës në verilindje të Ukrainës. Ministria ukrainase e energjisë tha se një objekt transporti gazi u shënjestrua nga disa dhjetëra dronë, të cilët shkaktuan dëme. “Forcat ruse nisën një tjetër sulm masiv ndaj objekteve të infrastrukturës energjetike në rajonin e Poltava-s, duke përdorur njëkohësisht raketa kruiz dhe dronë sulmues. Sulmi rezultoi në zjarre në shkallë të gjerë", tha ministria në Telegram. Sidoqoftë Ministria nuk specifikoi se cilat objekte të tjera përveç infrastrukturës së gazit u sulmuan. Rajoni i Poltavës është shtëpia e rafinerisë së vetme të naftës në Ukrainë, Kremenchuk, e cila është sulmuar vazhdimisht si nga dronë ashtu edhe nga raketa.