Pas takimit me Volodimir Zelenskyn në Shtëpinë e Bardhë dhe liderët europianë, presidenti amerikan, Donald Trump, ka telefonuar homologun rus, Vladimir Putin, e pohuar kjo nga vetë republikani. “Në përfundim të takimeve, e telefonova Presidentin Putin dhe i kërkova nisjen e përgatitjeve për një takim mes tij dhe presidentit Zelensky, vendi i të cilit do të përcaktohet më vonë”, ka shkruar Trump në mediat sociale. "Pas këtij takimi, do të kemi një përballje tjetër ku do të jenë të pranishëm të dy Presidentët dhe unë, shtoi ai, ndërsa theksoi se gjatë bisedimeve të djeshme u diskutuan garancitë e sigurisë për Ukrainën, të cilat ai thotë se "do të ofrohen nga vendet e ndryshme evropiane, me një koordinim me Shtetet e Bashkuara të Amerikës". “Ky është një hap shumë i mirë, një hap fillestar për luftën që ka nisur pothuajse katër vjet më parë”, ishte komenti i tij. Yury Ushakov, ndihmës i Putinit për çështje të jashtme, deklaroi se të dyja palët “shprehën mbështetje për vazhdimin e bisedimeve të drejtpërdrejta mes delegacionit rus dhe ukrainas”. Ideja “e ngritjes së nivelit të përfaqësuesve të palëve ukrainase dhe ruse” u diskutua gjatë bisedës telefonike, pohoi ai. Megjithatë, nuk është e qartë nga deklarata e Ushakovit nëse Putin ka pranuar që të takohet me Zelenskyn. Vetë kreu i shtetit ukrainas pohoi për gazetarët jashtë Shtëpisë së Bardhë pas takimeve se ai do të takohej me Putinin pa parakushte.