Qeveria australiane tha se do të përgjysmojë numrin e emigrantëve që pranon, në një përpjekje për të përmirësuar sistemin “e prishur” të imigrimit. Ky vend synon të pranojë 250.000 njerëz, shifër kjo në përputhje me nivelet para pandemisë së koronavirusit, deri në qershor të vitit 2025. Rregullat për viza, për studentët ndërkombëtarë, dhe punëtorët e pakualifikuar, do të ashpërsohen, po ashtu, sipas planit të ri. Migrimi është rritur në nivele rekorde në Australi, duke shtuar presionin në fushën e strehimit dhe infrastrukturës. Në anën tjetër, Australia ka nevojë për punëtorë të kualifikuar, dhe tenton të tërheqë sa më shumë të tillë. Duke prezantuar një strategji 10-vjeçare për migrimin, ministrja e Brendshme australiane, Clare O'Neil, tha se sistemi i emigrimit është “rrënuar” prej qeverisjeve të mëparshme. Një rishikim paraprak këtë vit, ka dalë në përfundimin se sistemi është “tërësisht i prishur”, shumë kompleks, dhe në nevojë për “reformë të madhe”. Një rekord prej 510.000 personash kanë shkuar në Australi këtë vit, por ministrja ka premtuar se do ta kthejë situatën nën kontroll. Në mesin e kërkesave të reja për emigrantët do të jetë edhe një nivel i caktuar i gjuhës angleze.